ភ្នំពេញ៖ មន្ត្រីសង្ឃទូទាំងប្រទេសនិមន្តជួបជុំគ្នា រៀបចំអនុសំវច្ចរមហាសន្និបាតលើកទី៣០ នៅសាលសន្និសិទចតុមុខ នាព្រឹកថ្ងៃទី១២ ខែធ្នូ ឆ្នាំ ២០២២។

រដ្ឋមន្ត្រីក្រសួងធម្មការនិងសាសនាលោក ឈិត សុខុន បានអញ្ជើញចូលរួមពិធីបើកអនុសំវច្ឆរមហាសន្និបាតមន្ត្រីសង្ឃទូទាំងប្រទេសលើកទី៣០ ដោយមានការចូលរួមជាអធិបតីភាពនៃ រដ្ឋមន្រ្តីក្រសួងមហាផ្ទៃ លោក ស ខេង ដែលជាព្រះរាជតំណាងនៃព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។

កម្មវិធីនេះមានការយាង និមន្ត និងអញ្ជើញចូលរួម ពីសម្ដេចព្រះមហាសង្ឃរាជទាំងពីរគណៈ ថ្នាក់ដឹកនាំព្រះសង្ឃគ្រប់ជាន់ថ្នាក់ ព្រះថេរានុត្ថេរៈ និងតំណាងសាសនានាៗ ដែលមានវត្តមាននៅកម្ពុជា និងសមាជិកសមាជិកាព្រឹទ្ធសភា រដ្ឋសភា និងរាជរដ្ឋាភិបាលសរុបប្រមាណចំនួន ៤៥០អង្គ/នាក់។

ក្រសួងធម្មាការនិងសាសនាបានឱ្យដឹងថា អនុសំវច្ឆរលើកទី៣០នេះគឺ ពិនិត្យមើលលទ្ធផលនៃការអនុវត្តសង្ឃប្រកាសរបស់អនុសំវច្ឆរមហាសន្និបាតមន្រ្តីសង្ឃកាលពីឆ្នាំកន្លងទៅ ដោយមានកិច្ចពិភាក្សា និងផ្លាស់ប្តូរយោបល់លើការងារព្រះពុទ្ធសាសនានាពេលបច្ចុប្បន្ន និងលើកទិសដៅសម្រាប់អនុវត្តនាឆ្នាំបន្តសំដៅពង្រឹងការអនុវត្តរចនាសម្ព័ន្ធដឹកនាំគ្រប់គ្រង និងរាល់លិខិតបទដ្ឋានគតិយុត្តដែលមានស្រាប់ធ្វើឱ្យវិស័យព្រះពុទ្ធសាសនាមានការរីកចំរើនថ្មីៗបន្ថែមទៀត។

គួរបញ្ជាក់ដែរថា កិច្ចប្រជុំនេះនឹងប្រព្រឹត្តទៅមានរយះពេល២ថ្ងៃ គឺចាប់ពីថ្ងៃ ទី១២-១៣ ខែធ្នូ ឆ្នាំ ២០២២៕